Nvidia და Microsoft-ი AI-ზე დაფუძნებულ ზემძლავრ სუპერკომპიუტერს ერთად შექმნიან

11/24/2022

გასულ კვირას ცნობილი გახდა, რომ ორ ამერიკულ გიგანტს, NVIDIA-სა და Microsoft-ს შორის მრავალწლიანი თანამშრომლობა დაიწყო, რომლის ფარგლებში კომპანიები AI-ზე დაფუძნებულ სუპერკომპიუტერს შექმნიან, რომელიც ხელოვნური ინტელექტის დასწავლისა და მასშტაბირებისთვის საჭირო დიდ დატვირთვას გაუძლებს. როგორც ირკვევა, პარტნიორობის ფარგლებში, Nvidia Microsoft-ის მასშტაბირებად ვირტუალურ ხელსაწყოებს გამოიყენებს, რომელთა დახმარებით ხელოვნური ინტელექტის მოდელებს განავითარებს.

ტექნოლოგიური გიგანტების მიერ შექმნილი სუპერკომპიუტერი Microsoft Azure-ის ღრუბლოვან ინფრასტრუქტურაზე აეწყობა და Nvidia-ს მიერ წარმოებული მძლავრი მიკროჩიპებით, H100-თა და A100-ით, ასევე Quantum-2 InfiniBand-ის ქსელური პლატფორმით იქნება აღჭურვილი.  Microsoft Azure-ისა და Nvidia-ს გრაფიკული პროცესორების გაერთიანებით შექმნილი ზემძლავრი სუპერკომპიუტერი ხელოვნური ინტელექტის დასწავლას, მასშტაბირებასა და გამოყენებას დააჩქარებს. ამასთანავე, კომპანიები ერთობლივად განავითარებენ DeepSpeed-ს – Microsoft-ის ღრმა დასწავლის ოპტიმიზაციის პროგრამულ უზრუნველყოფას.

„ხელოვნური ინტელექტის ტექნოლოგია და ინდუსტრიის მიერ მისი გამოყენების პროცესი საგრძნობლად დაჩქარებულია. გარღვევამ, რომელიც საბაზისო მოდელების გამოყენებამ შექმნა, კვლევისა და განვითარების ახალი ტალღა წარმოშვა, რის შედეგადაც ახალი სტარტაპები და ამ აპლიკაციების გამოყენების უახლესი გზები გაჩნდა“, – ვკითხულობთ Nvidia-ს კორპორაციული მიმართულების ვიცე-პრეზიდენტის, მანუვირ დასის განცხადებაში. „Microsoft-თან კოლაბორაციის შედეგად მკვლევრებსა და კომპანიებს უახლესი თაობის ხელოვნური ინტელექტის ინფრასტრუქტურას და პროგრამულ უზრუნველყოფას შევთავაზებთ, რომელიც მათ ხელოვნური ინტელექტის ტრანსფორმაციული ძალით კაპიტალიზაციის საშუალებას მისცემთ“.

უახლესი თაობის სუპერკომპიუტერი მნიშვნელოვან როლს შეასრულებს გენერაციული ხელოვნური ინტელექტის განვითარებაშიც – ცხადია, საუბარია DALL-E-სა და Stable Diffusion-ის მსგავს მოდელებზე, რომლებიც სხვადასხვა ტიპის კონტენტის, მათ შორის ტექსტის, კოდის, ციფრული სურათების, ვიდეო- და აუდიოწარმოებისთვის, თვითგანვითარებად ალგორითმებს იყენებენ. ბოლო წლებში ასეთი ტიპის ხელოვნური ინტელექტის მოდელების მიმართ არსებული მოთხოვნა საგრძნობლად გაიზარდა, ასე რომ დროა, მოთხოვნას ფეხი მიწოდებამაც აუბას.